Natingala ug wala gikalipay ni Mayor Rolando `Klarex’ Uy ang pagkawala sa mga requirements sa mga aplikante sa housing program sa buhatan sa City Housing & Urban Development Department (CHUDD) nga maoy kasagaran nga reklamo nga miabot kaniya.

 

Sa iyang radio program sa Magnum Radio, ‘Inyong Alagad, Mayor Klarex Uy’ kaganihang buntag, medyo nitaas ang tingog ni Mayor Klarex nga gitawag ang atensyon sa mga personahi sa CHUDD human usa ka aplikante ang subling miatubang kaniya ug mipadayag nga nawala ang mga papel nga iyang gisumiter, hinungdan nga hangtod karon wala pa sila nahatagan og relokasyon bisan sa kadugay na nila nga nag-apply.

 

“Ayaw ninyo pakasad-a ang katawhan sa pagkawala sa ilang papel, atimana ninyo kini,” pamahayag ni Maayor Klarex.

 

Ubay-ubay na nga mga aplikante sa housing program ang miduol sa mayor diin ang ilang reklamo mao nga nawala ang ilang mga requirements nga gisumiter sa buhatan sa CHUDD.

 

Nunot niini, usa sa mga personahi ang gimandoan ni Mayor Klarex nga moadto sa iyang buhatan aron hatagan siya og katin-awan kalabot sa nawala nga mga requirements. (ALR/CIO/Photo by Jomar Figuracion/CIO)