Bisan pa man sa kanunay nga pagpahimangno sa syudad ubos sa administrasyon ni Mayor Rolando `Klarex’ Uy pinaagi sa Night Market Management Committee ngadto sa mga ambulant ug sidewalk vendors nga dili na mamaligya sa wala gitugot nga oras, apan aduna gihapon pipila nga masinupakon.

 

Hinungdan nga padayon usab ang road clearing operations sa mga grupo sa Road and Sidewalk Clearing Unit (RasCU) sa Roads and Traffic Administration (RTA) uban sa kapulisan sa Police Station 2 sa Cagayan de Oro City Police Office (Cocpo).

 

Alayon niini, pipila ka mga sidewalk ug ambulant vendors ang nakuhaan sa ilang mga baligya human nasapon sa RaSCU basi usab sa kamanduan ni Mayor Klarex nga ikarga ang mga baligya kung magpadayon nga mosupak sa balaod ug gabayan sa syudad ang mga vendors.

 

Kanunay gipadayag ug gipahinumduman ni Mayor Klarex ang mga sidewalk ug ambulant vendors nga mosunod gayud sa balaod aron dili mabalda ang dagan sa trapiko ingon man ang kinabag-ang katawhan.

 

Hinuon, mayoriya sa mga sidewalk ug ambulant vendors ilabina kadtong na-profile ug gi-relocate ang misunod sa balaod ug gabayan hinungdan nga sa kinatibuk-an hapsay ug luag ang mga dalan palibot sa Cogon Market area ilabina ang dalan sa J.R. Borja, Osmeña ug Yacapin. (ALR/CIO/Photos from Night Market Team/RTA)