GIPANGULOHAN ni Mayor Rolando Klarex Uy ang paglusad karong adlawa Enero 30, 2023 sa Oro Transport Service Cooperatives (OROTSCO) sa ilang dugang nga 15 ka mga modernized vehicle units alayon sa pagtamod sa Public Utility Vehicle Modernization Program (PUV-MP) sa Department of Transportation.

 

Gidayeg ni Mayor Klarex ang dugang nga modernized vehicle sa OROTSCO nga magbiyahian sa Cogon-Cugman, sanglit makahatag kini og kaharuhay sa mga sumasakay sa pampublikong sakyanan.

Kahibaloan suportado sa kagamhanang lokal pinaagi sa Community Improvement Division sa pagpangulo ni OIC Mr. Honorio Diputado Jr. ang mga programa ug kalihukan sa transport cooperatives.

 

Sa laing bahin, gikalipay usab ni Regional Director Aminoden Guro sa Land Transportation Franchising and Regulatory Board (LTFRB) ang dugang nga modernized units sa OROTSCO nga adunay ruta nga Cugman-Cogon.

Dumduman tuig 2019 pa gilusad ang unang batch sa modernized vehicle sa OROTSCO nga adunay ruta nga Bugo-Igpit.

 

Ang nasangpit nga modernized vehicles adunay CCTV, air conditioned, adunay GPS tracking system ug nagamit na usab sa automated fare collection system o ‘cashless’ nga pagkolekta sa plete pinaagi sa beep cards.

Gi-anunsyo usab sa OROTSCO nga karon lang nga adlaw human sa launching mitanyag sila og ‘free rides’ o libreng pagpasakay sa Cogon-Cugman nga ruta.

 

Lakip misaksi sa maong launching si City Councilor Imee Moreno, Chairperson sa Committee on Cooperatives sa konseho; City Councilor Roger Abaday; City Administrator Atty. Hilario Roy Raagas ug Roads and Traffic Administration – Department Manager Engr. Nonito Oclarit.

 

Anaa usab ang mga opisyal ug representante sa uban pa mga stakeholders sama sa MASS-SPECC, Land Transportation Office, Office of Transportation Cooperatives ug Cooperative Development Authority. (AGP/Photos by Kim Zaldivar/CIO)