Gikatakdang mobalik ug magpadayon ang road clearing operation sa mosunod nga mga adlaw human nagpagawas og kamandoan si Mayor Rolando `Klarex’ Uy pinaagi sa Executive Order No. 024-2023 nga nag-usab ug subling gimugna ang Task Group Demolition nga gipangulohan ni Atty. Jose Edgardo Uy isip chairman.

 

Sa maong E.O. gipadayag ni Mayor Klarex nga gikinahanglan ang paglambigit sa TG Demolition sa pagdumala sa syudad, partikular na sa paglimpiyo ug paghawan sa mga illegal structures, ug obstructions sa mga kadalanan, lakip na mga sidewalk ug ambulant vendors ug uban nga nakalapas sa balaod.

 

Gani, gibutyag ni Atty. Uy nga magpahigayon sa ilang unang meeting ang TG Demolition karong adlaw’ng Biyernes Peb. 10.

 

Ang mga miyembro sa TG Demolition mao ang mga buhatan ug kadagkuan sa Office of the Building Official (OBO), City Engineering Office, City Administrator’s Office, City Legal, Roads and Traffic Administration (RTA), City Information Office (CIO), Cagayan de Oro City Police Office (Cocpo), City Social Welfare and Development Department (CSWD), City Housing & Urban Development Department (CHUDD), Liga ng mga Barangay pinaagi ni City Councilor Yan Lam Lim, SK Federation President City Councilor John Michael Seno nga maoy co-chairman sa Task Group, City Health Office, Bureau of Fire Protection (BFP), IBP MisOr, ug KBP. (ALR/CIO)