Nalingaw ang katawhan sa gilusad nga Love, Music and Dine diha sa foodcart section sa Night Market sa dalan Guillermo, Martes sa gabii Pebrero 13, 2023, nga gipasiugdahan sa administrasyon ni Mayor Rolando `Klarex’ Uy pinaagi sa City Tourism Office, uban usab sa Night Market Management Committee.

 

Una kining higayon nga adunay susamang kalihokan nga gipahigayon alang sa kasaulogan sa Valentines Day diin anaa ang city hall band.

 

Sa iyang mensahe, gidasig ni City Administrator Atty. Roy Hilario Raagas ang publiko nga suportahan ang maong kalihokan pinaagi sa pagsuroy sa maong dapit aron matabangan ang mga night market vendors nga mahalinan nga mao gayud ang tumong ni Mayor Klarex sa pagpahigayon sa nasangpit nga kalingawan.

 

Miduyog usab sa maong kalihokan sila si City Councilors Yan Lam Lim, ug John Michael Seno, kanhi Kag. Enrico Salcedo nga maoy co-chairman sa Night Market Team, pipila ka mga dep’t managers sa city hall, ilabina ang mga personahi sa City Tourism Office pinangulohan ni Acting Tourism Officer Rico Libre.

 

Anaa usab ang kapulisan sa Cagayan de Oro City Police Office (Cocpo) sa pagpangulo ni P/Col. Aaron Mandia, mga sakop sa Police Station 2 sa pagpangulo ni P/Maj. Julius Saluta, ug mga barangay tanods.

Ang Love, Music and Dine masinati ug masaksihan hangtod ugmang adlawa Pebrero 15. (ALR/CIO/Photos by Kim Zaldivar/CIO)