Dako ang pagpasalamat sa Sangguniang Kabataan sa Barangay Carmen ngadto sa kagamhanan sa Cagayan de Oro, Philippine Business for Education (PBEd), ug Citi Foundation human napili ang barangay Carmen isip usa sa mga pilot areas sa JobsNext Project.

 

Kahinumduman nga gilusad niadtong Pebrero 9, 2023 nila ni Mayor Rolando ‘Klarex’ Uy, ug mga kadagkoan sa PBED ang Jobsnext Project, usa ka programa nga nagtumong sa pag-umol ug pagpalambo sa kahibalo sa mga kabatan-onan, ilabina sa bag-ong teknolohiya.

 

Target sa maong programa kadtong nagpangidaron sa 18 ngadto 25 anyos nga kabatan-onan.

 

Matud pa ni Brgy Carmen SK Chairman Angelo Joseph Sabanal nga dakong tabang ang maong programa sa paghatag og kapasidad sa mga kabatan-onan nga ilang magamit sa umalabot nga panahon kung kini mangita na og trabaho.

Nasayran nga anaa sa 100 ka mga kabatan-onan sa syudad ang kasamtangan karon nagpailawom sa pagbansay sa JobsNext Project, ug kadaghanan kanila mga residente sa barangay Carmen.

 

Lakip usab sa gipasalamatan ni Sabanal si Mayor Klarex Uy sa mga programa niini ilabina sa pag tabang sa mga kabatan-unan nga maka tapos sa ilahang pag tuon pinaagi sa pag hatag ug City scholarships ning syudad ug sa plano niining pag bukas ug laing scholarship grants sa daghan pang mga kurso susama sa mga Medical Courses ug mga post graduate courses sa mga kagay-anon. (GB/photos by Kim Zaldivar of CIO)