GI-ANUNSYO karon ni Mayor Rolando ‘Klarex’ Uy ang laraw nga pag-usbaw sa binulan nga honorarium alang sa mga barangay tanod ning dakbayan karong tuiga.

Kini ang gibutyag sa mayor atol sa iyang pagtambong sa pagpakayab sa nasudnong bandila karong adlawa, Pebrero 20, diha sa barangay Bayanga ning syudad.

Sa pagkakaron, gadawat ang mga barangay tanod og P500 pesos matag bulan isip counterpart honorarium gikan sa syudad, ug plano ni Mayor Klarex nga dugangan kini ug himoong P1,000 pesos matag bulan.

Nakita matod pa ni Mayor Klarex ang kalisod ug sakripisyo nga gisagubang sa mga barangay tanod sa tinguha nga makatabang sa pagpatunhay sa kahusay ug kalinaw sa dakbayan.

Hinuon, moagi pa sa tukmang proseso ang nasangpit nga lakang. (AGP/Photos by Jay Arancon/CIO)