Monday, 13 March 2023 01:20

DONASYON SA REPLICA SA PT BOAT 41 NGA GIGAMIT NI MACARTHUR GIDAWAT SA SYUDAD

Written by
ALAYON sa pagtamod sa ika-81 ka tuig nga kasumaran sa paghidangat ni General Douglas MacArthur sa pantalan sa Macabalan ning syudad, pormal nga gidawat sa kagamhanang lokal sa Cagayan de Oro ang donasyon nga replica sa Patrol Torpedo (PT) Boat 41 scale model nga gipahigayon diha sa Mac Arthur Memorial Marker, barangay Macabalan karong adlawa, Marso 13 ning tuig.
 
Dumduman ang PT Boat 41 mao ang gisakyan ni General Mac Arthur kauban ang iyang pamilya ug mga sakop sa iyang pagtabok gikan sa Corregidor niadtong Marso 11 hangtod miabot sa pantalan sa Macabalan niadtong Marso 13, 1942.
Ang nasangpit nga replica gipundohan pinaagi sa sons and daughters of World War II Guerillas ug USAFFE veterans ug uban pang personahe ug grupo.
 
Ang maong programa gipangunahan sa City Tourism and Cultural Affairs Office ug City Historical and Cultural Commission uban sa hugot nga suporta sa Philippine Veterans Affairs Office, Veterans Federation of the Philippines, VFP – Sons and Daughters Association Inc., 4th Infantry Division Philippine Army, Philippine Ports Authority, kagamhanang lokal sa Macabalan ug uban pang sektor.
 
Gipadangat usab ni City Mayor Rolando ‘Klarex’ Uy ang iyang mensahe pinaagi ni City Administrator Atty. Roy Hilario Raagas.
 
“Sa atong pagpahalipay karong adlawa sa ika-81 nga kasumaran sa pag-abot ni General Doughlas Mac Arthur sa pantalan sa Macabalan ning atong dakbayan, kita nagahimo og dakong pagtimaan sa kasaysayan ug mga pagpakabana sa mga katawhan sa atong lungsod. Kini nga okasyon, nagtugot kanato nga mahinumdom ug magpasalamat sa mga bayani sa atong nasod ug mga kaalyado nga misagubang sa kahadlok sa panahon sa gubat sa pagpanalipod sa atong yutang natawhan,” sigon sa mayor.
 
Mitambong usab sa kalihokan si Vice Mayor Jocelyn Bebot Rodriguez, City Councilor Romeo Calizo ug City Councilor James Judith. (AGP/Photos by Kim Zaldivar/CIO)