Human sa consultative meeting nga gipahigayon sa syudad tali sa nagkadaiyang transport groups nga may kalambigitan sa reklamo batok bao-bao, isumite sa Roads and Traffic Administration (RTA) ngadto sa Komitiba sa Public Utilities ang mga suhestiyon, reklamo ug hangyo nga gipaabot sa matag grupo alang sa tukmang aksyon.

 

Gipadayag ni Engr. Nonito Oclarit, dep’t manager sa RTA nga maoy nagdumala sa maong katiguman nga isumiter usab niya kang Mayor Rolando `Klarex’ Uy ilabina nga ang mayor mismo ang naghangyo nga ipahigayon ang consultative meeting.

 

Alayon niini, walay mga aksyon nga himoon ang mga personahi sa RTA kalabot sa mga bao-bao nga namasahero ning syudad hangtod adunay tukmang aksyon ang City Council sigun sa rekomendasyon sa Committee on Public Utilities nga gipangulohan ni City Councilor Romeo Calizo.

 

Apan dili usab mapugngan ang mga personahi sa Land Transportation Office (LTO-10) nga dakpon ang mga bao-bao nga masapon nga namasahero ug moagi sa national highway.

Subling gipadayag sa mga kadagkuan sa LTO-10, ug Department of Interior and Local Government (DILG) nga wala gitugutan ang mga bao-bao nga mamasahero ilabina ang pag-agi sa national highway. (ALR/CIO/Photos by Roel Felicitas/CIO)