Wednesday, 29 March 2023 23:57

BAG-ONG GARBAGE COLLECTOR SA CdeO, OPERATIONAL NA

Written by
GISUGDAN na sa syudad pinaagi sa bag-ong contractor ang paghakot sa mga basura human gi-award sa administrasyon ni Mayor Rolando “Klarex” Uy sa JOMARA Konstruckt Corporation pinaagi sa bag-ong nahuman nga bidding process.
 
Sa programa ni Mayor Klarex nga “Inyong Alagad, Mayor Klarex”, iyang gibutyag nga sugdan na ang paghakot ug paghinlo sa mga basura sa syudad ug nagpasalamat ang mayor sa pagsabot sa katawhan sa kakulangon niini, sanglit gipaagi man gayud sa saktong proseso ang pag-award sa bag-ong garbage collector.
 
Matud ni Mayor Klarex, usa sa mga mahinungdanong konsiderasyon nga gilantaw sa syudad nga adunay kapasidad ang contractor sa pagkolekta sa basura, ingon man nga hatagan usab og saktong benepisyo ang mga empleyado niini.
Matud ni Engr. Armen Cuenca, hepe sa City Local Environment and Natural Resources Office (CLENRO), nga laumang matapos ug mahinlo na ang mga nahibiling basura sa syudad sulod sa usa ka semana ug sugdan na dayon ang saktong oras sa pagkolekta niini.
 
Ang Jomara Konstruckt nakabasi sa Cebu ug aduna kini joint venture sa Tinsel Construction dinhi sa Cagayan de Oro nga maoy naglantaw sa inadlaw-adlaw nga operasyon niini. (ACM/CIO/Photos courtesy of Clenro)