PADAYONG gibantayan sa City Disaster Risk Reduction and Management Department (CDRRMD) pinaagi sa pagsunod sa mga advisories nga gipagula sa Philippine Atmospheric Geophysical and Astronomical Services Administration o PAGASA kalabot sa El Nino phenomenon.

 

Sa gipagawas nga advisory sa CDRRMD nga gikan usab sa PAGASA, ang El Nino Southern Oscillation (ENSO) Alert and Warning System mipataas na sa EL Nino Alert sa nasud ug nagpahimangno sa katawhan sa paghimo og mga pagpangandam sa epekto niini.

 

Gani man, gimandoan na ni Mayor Rolando “Klarex” Uy ang pipila ka mga buhatan sa city hall sa paghimo og mga lakang aron malikayan ang dakong epekto sa El Nino ilabina sa mga mag-uuma ug mga produkto niini.

Gipahimangnoan usab ni Mayor Klarex ang katawhan sa pagmatngon ug paglikay sa sobrang exposure sa init ug pag-inom og daghang tubig aron magpabiling hydrated kanunay.

 

Basi sa model forecast, nagpakita kini nga ang El Niño posibleng masinati sa mga bulan sa June-July-August ug adunay 80% nga posibilidad nga magpadayon sa mga unang bulan sa tuig 2024. (ACM/CIO)