ANDAM nang modawat ang JR Borja General Hospital (JRBGH) og mga pasyente nga nanginahanglan og hemodialysis treatment human nadawat niini ang License to Operate (LTO) nga gihatag sa Department of Health bag-ohay lang.

 

Gani man, misaksi mismo si Mayor Rolando “Klarex” Uy sa pagdawat sa pinakaunang pasyente nga nakapahimulos sa hemodialysis treatment Huwebes sa buntag diha sa city hospital, kauban ang mga kadagkoan ug mga personahe sa JRBGH.

 

Kahinumdoman nga andam na ang maong serbisyo sa city hospital sa nilabay’ng tuig apan nagpaabot na lamang kini sa LTO alang sa pagdawat og mga pasyente.

 

Sa mensahe ni Mayor Klarex atol sa pagbukas sa Hemodialysis Unit, iyang gipasalamatan ang mga tigdumala sa JRBGH nga gipangulohan ni executive overseer Dr. Ferdie Miranda ug JRBGH chief of hospital Dr. Michael June Perez tungod sa ilang panglantaw ug paningkamot nga mapalambo ang maong hospital ug mahatagan og sakto’ng serbisyo ang katawhan ilabina ang mga kabus nga pasyente.

 

Gipasalig usab ni Mayor Klarex ang iyang suporta sa JRBGH ug mga kalamboan niini sanglit giisip niini nga kauban niya ang tanan sa pag-alagad sa katawhan. (ACM/Photos by ROD CONSTANTINO/CIO)