Misalmot ang nagkadaiyang barangay ning syudad sa simultaneous nationwide barangay road clearing operations niadtong adlaw’ng Biyernes, Mayo 10, 2024.

Alayon kini sa Memorandum Circular No. 2024-053 sa Department of Interior and Local Government (DILG) alang sa “Nationwide Implementation of the Barangay Road Clearing Operations, Assessment, Validation and Recognition under the Bagong Pilipinas Program”.

 

Misalmot usab ang Task Group Demolition ning syudad ilawom sa administrasyon ni Mayor Rolando `Klarex’ Uy pinaagi sa pagpangulo ni Antonio S. Resma, Jr. aron pagtabang sa mga barangay sa ilang clearing operations.

 

Usa sa mga barangay nga gi-assist sa TG Demolition mao ang Barangay Indahag pinangulohan ni Punong Barangay Marlon D. Bongay uban sa iyang konseho ilabina ang committee chair sa peace and order and transportation, Cagayan de Oro City Police Office, Bureau of Fire Protection, barangay tanod ingon man ang Movable Action Team sa TG Demolition.

 

Ubay-ubay ka mga illegal structures, ug road obstructions ang gihawanan sa nagkadaiyang lugar sa maong barangay.

 

Naglaum si Resma nga pinaagi sa maong kalihokan ug sa bag-ong kamanduan sa DILG mohimo sa ilang inisyatiba ang mga barangay nga ipadayon ang pagpatuman og road clearing sa ilang tagsa-tagsa ka mga barangay. (ALR/CIO/Photos by Reynan Baylin/CIO)