April 17, 2020 - Gikompirma ni Cagayan de Oro City Mayor Oscar Moreno nga adunay panibag-ong positibo nga kaso sa COVID-19 ang kamulong gi-atiman sa Northern Mindanao Medical Center (NMMC).

Sa gipatigayon nga ika-30 nga press conference sa CdeO City Government alang sa COVID-19, gi-ambit ni Moreno nga ang panibag-ong pasyente kay usa ka 68-anyos nga lalake nga residente sa Marawi City.

Gi-dugang ni NMMC Medical Director Dr. Jose Chan nga ang pasyente kay gi-admit sa ospital adtong April 9, 2020 apan bag-uhay lang kini nagpositibo sa COVID-19. Matod niya, wala’y history sa pagbiyahe ang pasyente.

“Wala ni siya’y travel history; pero aduna lang siya’y history na exposure sa iyang anak na gikan sa Manila,” ingon ni Chan.

Gi-ambit usab ni Chan nga stable ang kahimtang sa pasyente pero gabati kini og paglisod sa pagginhawa gawas sa lain pa nga mga balati-an.

“Daghan sad gibati ning pasyente; dili lang ubo, pero naa pud siya’y diabetes, history sa iyang problema sa kidney; naay co-morbidities.”

Gidugang usab ni Chan nga ang pasyente kay kasamtangang gikabitan og oxygen.

Sa pagkakaron, aduna na’y duha (2) ka pasyente ang kamulo na nga gitambalan sa NMMC. Ang usa kay ang 16-anyos nga batang babae nga anak ni PH598 ug iyahang bana nga una na nga nag-negatibo.

Kasamatangan nga nagpabilin sa 11 ka kaso ang natala sa Northern Mindanao kay ang bag-ong kaso sa COVID-19 na gi-admit sa NMMC kay lumulupyo sa Bangsamoro Autonomous Region in Muslim Mindanao (BARMM).