Mipadayag sa iyang hugot nga pagsuporta si Mayor Rolando `Klarex’ Uy sa tinguha ug mga programa sa Regional Road Safety Consultative Advocacy Council 10 human usab kini mipirma sa Memorandum ug Agreement (MOA) tali sa maong grupo atol sa paglusad niini Martes Hunyo 18, 2024, nga gipahigayon diha sa City Tourism Hall.

 

Kauban ni Mayor Klarex nga mipirma si Vice Mayor Jocelyn Rodriguez isip representante ni 2nd Dist. Rep. Rufus Rodriguez, uban usab sa mga representante sa gobernador sa Misamis Oriental ug sa 1st Dist. sa Cagayan de Oro.

 

Gipasabot sa mga kadagkuan sa maong grupo nga tumong sa ilang adbokasiya nga mokunhod ngadto sa 30 porsiyento ang kaso sa road crashes sa Mindanao tungod sa pagsaka sa aksidenti sa kadalanan nga miresulta sa daghang casualties.

 

Si Mayor Klarex namahayag nga ang pagtinabangay ug pagtimbayayong ang gikinahanglan diin ang kagamhanan ning syudad uban ang mga hintungdang buhatan sa city hall mosuporta gayud sa programa.

 

“Kanunay mosuporta sa tanang higayon ang dakbayan sa Cagayan de Oro,” dugang ni Mayor Klarex.

 

Lakip sa misalmot sa kalihokan ang mga kadagkuan sa rehiyonal nga buhatan sa Philippine National Police (PRO-10), Cagayan de Oro City Police Office (COCPO), Land Transportation Office (LTO-10), Land Transportation Franchising and Regulatory Board (LTFRB-10), Highpay Patrol Group (HPG-10), Bureau of Fire Protection (BFP-10), Department of the Interior and Local Government (DILG), Department of Health (DOH), Department of Public Works and Highways (DPWH), Roads and Traffic Administration (RTA), mga transport groups ug uban pa nga mga hintungdang ahensya. (ALR/CIO/Photos by Jomar Figuracion/CIO)