Mahinungdanon ang papel sa barangay sa pagsumpo sa gidiling druga kay sila man ang mas unang mahibalo sa mga kalihokan sulod sa ilang barangay hinungdan nga gihagit sila nga seryosohon ang kampanya batok sa ilegal nga druga.

 

Sa iyang mensahe atol sa pagbukas sa kasaulogan sa International Day Against Drug Abuse and Illicit Trafficking (IDADAIT) 2024, gipadayag ni Oliver Egypto, dep’t manager sa City Community Affairs Department, nga walay mahimo ang City Anti-Drug Abuse Council (CADAC) kung walay buhaton ang Barangay Anti-Drug Abuse Council (BADAC).

 

Nagdala sa tema “The Evidence is Clear: Invest in Prevention”, gihagit ni Egypto ang mga barangay nga mag-invest sa drug prevention.

 

Samtang, gipadayag ni DILG City Director Engr. Jane Docallos nga ang ilegal nga druga mao ang pinakadako nga problema sa kriminalidad diin responsibilidad sa tanan ang pagpakigbatok niini.

 

Mipaabot usab sa iyang mensahe si Mayor Rolando `Klarex’ Uy, pinaagi sa iyang spokesperson nga si Janboy Actub, diin iyang gihatagan og importansya ang kamahinungdanon sa maong kalihokan kay dili magmalampuson ang kampanya batok gidiling druga kung wala ang pagtinabangay sa tanang stakeholders.

 

Si Dr. Rhyselle Bernadette Melliza-Descallar, division head sa City Anti-Drug Abuse Division-Oro Wellness Center, naglaum nga ang mga barangay magpahigayon og kalihokan sa ilang CBDRP alayon sa kasaulogan sa IDADAIT 2024. (ALR/CIO/Photos by Roel Felicitas and Reynan Baylin/CIO)