MOKABAT sa 250 ka Child Development Teachers (CDT) ug Supervised Neighborhood Play (SNP) volunteers ning siyudad miduyog sa kasaulogan sa ‘National Day Care Workers Week,’ nga gipahigayon, Hunyo 28-29 ning tuig.

 

Atol sa kalihokan, gipahigayon ang usa ka Santos nga Misa diha sa St. Augustine Metropolitan Cathedral diin gisugdan sa usa ka motorkada padulong sa Minkay Beach Resort, Initao, Misamis Oriental.

 

Samtang, mipahigayon og team-building exercise, Larong Pinoy tali sa mga CDT ug gihatagan usab sila og 20 ka ECCD-related material set gikan sa UNICEF; ECCD checklist toolkits ug 80 sets sa musical instrument kit; 200 ka salter weighing scale gikan sa Department of Social Welfare and Development (DSWD) X ug rice incentives alang niadtong nanerbisyo sa panahon sa kalamidad; aduna usab raffle door prizes gikan ni Mayor Klarex Uy, ug UNICEF - ECCD Consultant Enrico G. Baloro.

 

Sa laing bahin, gihatagan ang 60 ka SNP volunteers sa ilang honorariums nga balor og P5,304.00 matag usa alang sa duha ka bulan nga pagpanerbisyo ug gipasidunggan ang mga CDT kinsa nagserbisyo sulod sa kapin lima ka tuig tungod sa ilang dedikasyon, devotion, ug way puas nga gugma sa kabataan.

 

Mitambong sa kalihokan sila si CSWD Department Manager Anecia C. Tongson, (RSW); CSWD Assistant Department Head for Administration Atty. Threjann Ace Noli, CSWD Consultant Dr. Reuben “Boboy” Daba, UNICEF - ECCD Consultant Enrico G. Baloro, CSWD ECCD, PWD & Senior Citizen Supervising Social Worker Joan Acraman, CSWD District Heads ug uban pa.

 

Ang kalihokan inisyatiba sa CSWD Department Early Childhood Care and Development (ECCD) Unit uban sa temang, "Building Bridges, Changing Lives: Honoring the Compassion and Commitment of Child Development Workers," ug tumong nga mahatagan og bili ang mga CDT ug SNP volunteers sa ilang pagserbisyo ngadto sa mga gagmay’ng kabataan diin usa sa hinungdan nga nahimong #ChildFriendly city ang siyudad. (NLB/CIO/photos courtesy of CSWD ECCD).