Thursday, 23 April 2020 03:41

TeleConsultation gimugna sa City Health Office

Written by CDO COVID19 Response Team

Gisugdan sa City Health Office ang pagpatigayon og “TeleConsultation” karong April 22, 2020. Kini gi-ambit ni City Health Office (CHO) Officer-In-Charge Dr. Lorraine Nery sa gimugna nga ika-33 nga press conference alang sa COVID-19.

 

Pina-agi sa Facebook page nga “CDO City Health Office Doctors,” gibutyag ni Nery nga mamahimo nga magpakonsulta sa mga doktor sa CHO ingon man mangutana kalabot sa COVID-19 ang publiko pina-agi sa pag-message sa FB page.

 

“There will be medical officers na mag-answer sa ilang mga panginahanglanon,” matod pa ni Nery. “Pwede pod makapangutana ang public regarding COVID responses or any other concerns sa ilang health.”

 

Ang “TeleConsultations” ipatigayon gikan sa 8:00AM hangtod 5:00PM, Lunes hangtod Biyernes. Apan gisiguro gihapon ni Nery nga padayon gihapon ang pag-serbisyo kada Sabado ug Domingo pina-agi sa mga barangay health centers.

 

“Although taman ra ni siya Monday to Friday, wala gihapon hunong ang serbisyo; they can access sa ilang own barangay health centers na mga numbers, mga barangay health workers ug mga nurses and doctors pwede ra matawagan,” matod ni Nery.

 

Gisubli usab niya nga kanunay pud sila naka-andam nga magrespondar kung aduna may mga report sa posibleng kaso sa COVID-19.

 

“CHO HEMS staff are available 24/7 na ma-contact to assist and evaluate kung kailangan ang person i-transport.”

 

Sa pikas bahin, gi-ambit pod ni Medical Specialist II Dr. Bernard Rocha gikan sa Northern Mindanao Medical Center (NMMC) nga padayon sad ang TeleConsultation sa ospital ingon man ang mga basic services.

 

“Padaon sa Teleconsultaton para sa mga patients na nag-follow-up sa ilang mga gibati mahimo sila na motawag sa hospital ug dili kinahanglan muadto,” ingon pa ni Rocha.

 

Gidugang pa niya: “OPD(Out-Patient Department) services are also open; pwede gihapon muadto sa NMMC.”