DUGANG classroom building na usab ang gisubhan ni Mayor Rolando “Klarex” Uy adlaw’ng Huwebes, Hulyo 4 ning tuig alang sa Carmen National High School sa Brgy Carmen ning syudad.

 

Mokabat sa kapin P51 milyones ang pundo nga gigahin sa maong tunghaan gikan sa Special Education Fund (SEF) ug diin aprobado kin isa Local School Board.

 

Sa mensahe ni Mayor Klarex, dako ang iyang kalipay nga nakita ang kalamboan sa Carmen National High School nga una niyang gidamgo ug gipaningkamotan sa panahon nga una siyang nahimong barangay Kapitan sa Brgy Carmen 24 ka tuig na ang milabay.

 

Dugang ni Mayor Klarex nga pangandoy lamang niya kini sa nagsugod pa lamang siya isip barangay Kapitan ug dili matukib ang iyang kalipay ug garbo nga nasaksihan ang dakong kausaban sa Carmen National High School.

 

Ang maong tunghaan usa sa mga pinasahi nga “Tatak Klarex” classrooms nga aduna kini built-in multi-media package nga naglangkob sa SMART TV, projector, sound system, desktop computer ug Wi-Fi ready.

 

Aduna usab kini functional nga fire alarm system sa panahon nga adunay mga panghitabo.

 

Misaksi usab si Punong Barangay Raineir Joaquin “Kikang” Uy, ug mga kadagkoan sa Department of Education – Division of Cagayan de Oro sa pagpangulo ni Schools Division Supt Dr Roy Angelo Gazo.

 

Tumong sa administrasyon ni Mayor Klarex nga mahatagan og kasayon ug kahamugaway ang mga estudyante ingon man magtutudlo sa tinguha usab nga mas mapalambo pa gayud ang edukasyon sa syudad.

 

Ang edukasyon usa sa mga nag-una RISE agenda ni Mayor Klarex ug sa iyang administrasyon. (ACM/CIO Photos by ROEL FELICITAS)