GIHAN-AY na sa kagamhanang lokal ang pagplastar sa mga manindahay subay sa nagkaduol nga kasaulogan sa Higalaay Festival ning syudad.

 

Gibutyag ni City Councilor Jay Roa Pascual, nga adunay gitagana nga luna alang sa mga gagmay’ng negosyante nga buot mobaligya sa ilang mga produkto diha sa Duaw Park, Gaston Park, Cogon and Macasandig Bridge.

 

Matud ni Pascual giplastar sa kagamhanang lokal ubos sa administrasyon ni Mayor Klarex Uy ang tanan nga buot mobaligya agig dugang panginabuhian ug kasadya sa kapistahan ni Senyor San Agustin, ang patron sa Cagayan de Oro.

 

Gipasabot usab ni Pascual nga kalabot sa gitagana usab alang sa mga buot mobaligya sa Rio de Oro Boulevard ug sa organizers niini nga bukas kini sa tanan nga mamaligyaay nga makagahum sa pagbayad sa ilang kaugalingon tiglimpyo, ingon man makabutang og kaugalingong kuryente, tubig ug security guards ilabina gyud nga mamentinar ang kahinlo sa dapit sulod sa 28 ka adlaw nga Higalaay Festival.

 

Kini usab agig pagpasabot ni Pascual sa P50 mil nga abang sa mga stalls nga mipadayag sa ilang kaikag sa pagbaligya atol sa Higalaay Food Park Rio de Oro Boulevard. (CIO)