Pasiunang gibuksan karong adlawa, Biyernes, ang laing sanga sa Gaisano chain of mall and superstores diha sa may uptown area sa Cagayan de Oro, diin gitambongan mismo ni Mayor Klarex Uy ang maong soft opening.

 

Sa iyang mensahe, namahayag si Mayor Klarex nga ang pag-abri sa Gaisano City Uptown usa ka timailhan ug pagmatuod sa dakong pagsalig ug kompiyansa sa mga negosyante sa ‘investment and business climate’ sa dakbayan.

 

“Dako nakong garbo ug kalipay ang inyong gipakita nga pagsalig ug kompiyansa sa pamunoan sa dakbayan tungod kay makahatag kini og malungtarong epekto diha sa ekonomikanhong kalamboan sa dakbayan, ilabina sa natad sa panarbaho sa atong mga kaigsoonan”, matud pa ni Mayor Klarex.

 

Dugang pa ni Mayor Klarex nga dili maangkon ang paspas nga paglambo sa ekonomiya sa Cagayan de oro kung wala ang hugot nga suporta ug aktibong pakiglambigit sa local business community ug private sector.

 

Gani man, gipasigarbo sa mayor nga giila sa Philippine Chamber of Commerce and Industry ang Cagayan de Oro isip usa sa mga awardees sa ‘most business-friendly highly urbanized city’ sa tibook nasud sa miaging tuig.

 

Niadtong bulan sa Mayo ning tuig, girekognisar usab sa Oxford Economics, usa ka think tank nga nakabasi sa United Kingdom, ang dakbayan sa Cagayan de Oro isip usa sa usa ka libo ka mga syudad sa tibook kalibotan nga adunay pinakadako nga ‘urban economy’ basi sa ilang global city index.

 

“Dili kini maangkon sa atong dakbayan nga mga pasidungog kung wala ang kasibot sa paningkamot ug pagtinabangay tali sa kagamhanan sa syudad, business ug private sector, mga nasudnong ahensya sa gobyerno ug sa tanang stakeholders…ug busa, kaninyong tanan, daghan kaayong salamat”, panapos ni Mayor Klarex. (CIO)