Nakig-koordinar karon ang Police Station 10 Cugman sa buhatan sa Department of Education-City Schools Division ug konseho sa barangay Cugman aron masulbad ug madakpan ang mga suspetsado sa pagpahigayon og illegal drug sessions sulod sa mga classrooms sa wala pa nagamit nga Cugman National High School sa may Zone 9, barangay Cugman.

 

Kini human nakadawat og taho si City Police Director Col. Salvador Radam nga matud pa gihimong ‘drug den’ ang bag-ong turnover nga 42-classroom school building duha ka tuig na ang milabay.

 

Sa imbestigasyon sa kapulisan sa Police Station 10 Cugman subay sa kamandoan ni Col. Radam, mihimo gilayon og pakisusi sa Cugman National High School ang kapolisan ubos sa pagpangulo ni PCPT Macario L. Linog Jr. ug nakita niini ang mga aluminum foils sulod sa mga classrooms una ug ikaduhang andana nga gituohang gigamit sa mga suspetsado atol sa ilang illegal drug sessions.

 

Ang Cugman National High School nga nahimutang sa Upper Zone 9, Barangay Cugman adunay 42 ka classrooms ug duha na ka tuig nga nahuman apan wala pa nagamit tungod sa kawad-on sa koneksyon sa tubig iug kuryente.

 

Giingong gipangkawat pa usab ang mga kagamitan sa maong tunghaan sama sa mga suga, wiring, circuit breakers, door knobs, water closets, tangke sa tubig, samtang ang mga bintana niini nga jalosies ang nangabuak ug nadamyos matud pa. (ALR/CIO/photos by PS 10 Cugman)