NAGPASUNDAYAG sa nagkadaiyang talento ang 10 ka mga contingents alang sa Mayor Rolando ‘Klarex’ Uy Talentadong Kagay-anon Year 2 Grand Finals, nga gipahigayon diha sa Don Gregorio Pelazez Sports Center, Agosto 27, 2024.

 

Ang maong kalingawan hatod usab kaninyo ni Talentadong Kagay-anon Year 2 co-chair Vice Mayor Jocelyn Bebot Rodriguez kauban ni City Councilor Suzette Magtajas Daba sa tinguha nga mahatagan sa kahigayonan ang mga Kagay-anon nga mapakita ang talento.

 

Ang kompetisyon nabahin sa duha ka kategorya nga naglangkob sa Inter-school category ug Inter-barangay category nga dunay tag lima ka mga contingents.

 

Gumikan sa kalipay nga hatod sa mga talentadong kagay-anon, gidugangan ni Mayor Klarex ang papremyo nga madawatan sa mga mananaog.

 

Nahimong kampyon alang sa Interschool category ang Misamis Oriental General Comprehensive High School (MOGCHS) Arnis team ug modawat og cash prize nga P60,000, trophy, ug dugang P5,000 gikan sa DITO telecommunity.

 

Nasakmit usab nila ni Maverick Joel P. Cabuguas ug Jezabel G. Jandayan gikan sa Cagayan de Oro National High School ang 2nd place ug modawat og P50,000 nga premyo ug trophy.

 

Samtang nahimong 3rd placer ang Agusan National High School SPA Dance sports nga adunay P40,000 nga premyo ug trophy.

 

Alang usab sa inter-barangay category, midaog isip champion ang garbo sa Barangay Macasandig nga si Normann Bel Casiño nga adunay cash prize nga P70,000, trophy ug dugang P5,000 gikan sa DITO Telecommunity.

 

Nahimong 2nd placer ang gikan sa Barangay Nazareth nga si Jairus O. Salamin nga modawat og papremyo nga P55,000 ug trophy.

 

Samtang si Jophil Cece usab gikan sa Barangay Bonbon ang nakasamit sa 3rd place nga modawat og P45,000 nga premyo ug trophy. (AGP/Photos by Reynan Baylin/CIO)