MIDUYOG ang siyudad sa Suicide Prevention Awareness month pinaagi sa usa ka community walk for a cause, Septiyembre 10, diha sa Rio de Oro Boulevard, ning siyudad.

 

Ang community walk for cause gisugdan sa entrada sa Barangay Consolacion ug gitapos sa entrada sa Barangay Puntod diin gisundan gilayon sa hamubo nga programa ug gipakita ang usa ka video campaign batok suicide.

 

Mipadayag sa ilang mensahe si City Gender and Development Focal Point System Representative Jocelyn Peñalosa kinsa mirepresentar ni City GAD Co-chair Sheila Lumbatan ug City Social Welfare and Development (CSWD) Department Officer Annie Tongson kinsa mirepresentar ni Mayor Klarex Uy ug CSWD Psychosocial Division Project Head Ella Marie Sumampong.

 

Samtang, gipadayag usab ni City Psychologist Jaymee Leonen-Pagaspas ang storya bahin sa tema ning tuig nga, “Changing the Narrative on Suicide: Change your story with us.”

 

“When we talk about narrative, it’s how you tell your story, unsa diay imong paglantaw sa imong kaugalingon sa imong kasamtangang sitwasyon ug kaugmaon. Ang atong mga igsuon nag-atubang sa sakit nga Depression o naghuna-huna nga hunoson na lang ang ilang kinabuhi. Sila atong mga igsuon na puro kalisud, kawad-an sa paglaum, puro kangitngit ang nakita sa ilang sitwasyon karon ug sa ilang kaugmaon, apan pinaagi sa atong pag-inubana karong adlawa, gipakita nato sa atong mga igsuon na dili kana lamang ang ilang story. Their stories don’t have to end there. They have a bright future ahead of them and they don’t have to face these challenges alone alongside all the 1500 to about 2,000 people who walked with us this morning,” saysay ni City Psychologist Leonen-Pagaspas.

 

Mokabat sa dul-an 2,000 ka mga empleyado sa LGU-CDO, national government agencies, private and non-government organizations ug mga tunghaan ang misalmot sa maong kalihokan.

 

Tumong sa maong kasaulogan nga mahingusgan sa siyudad ang kampanya kalabot sa Suicide Prevention nunot sa kasaulogan sa Suicide Prevention Awareness month.

 

Nasayran nga ang Septiyembre 10 giilang World Suicide Prevention Day. (NLB/CIO/photos by Reynan Baylin and Kim Zaldivar/CIO)