Mokabat 21 ka molupyo gikan sa walo ka barangay ning syudad ang nakadawat sa titulo sa ilang yuta pinaagi sa Handog Titulo Program’ atol sa pagpang-apod-apod niini sa pagpangulo ni Mayor Rolando Klarex’ Uy uban sa Department of Environment and Natural Resources (DENR-10) nga gipahigayon sa city hall quadrangle Huwebes, Sept. 12, 2024.

 

Ang land title distribution gihingusgan sa Land Asset Management Office (LAMO) ning syudad uban sa mga personahi sa Provincial Environment and Natural Resources Office (PENRO-MisOr) pinangulohan ni Atty. Xandra Yzabelle T. Ebdalin-Bacus.

 

Samtang ang mga benepisyaryo gikan sa Barangays Indahag, Agusan, Bayanga, Tignapoloan, Iponan. Pagatpat, Lumbia, Tagpangi, ug Carmen.

 

Sa iyang mensahi, gipahalipayan ni Mayor Klarex ang mga benepisyaryo kay nadawat na nila ang titulo sa ilang yuta nga sa dugay’ng panahon nga ilang gihandum.

 

“Hinaut nga inyong ampingan ang inyong titulo kay dili ang tanan nahatagan og kahigayonan sama kaninyo,” dugang ni Mayor Klarex.

 

Hatagan og bili ang mga tawo nga naningkamot ug naghago aron ilang maangkon ang seguridad sa ilang pagpuyo dugang sa mayor.

 

Gipasalamatan usab ni Mayor Klarex ang DENR, CENRO ug PENRO sa ilang inisyatiba ug sa kanunay nga pag-abag sa mga programa sa syudad ilabina sa tumong nga mapaspasan ang proseso ug pag-dispose sa public land titles partikular na sa residential free patent, agricultural patent ug homestead patent.

Lakip sa mitambong sa kalihokan si City Councilor Roger Abaday.

 

Ang `Handog Titulo Program’ nahimo alayon sa ika-123rd Land Anniversary. (ALR/CIO/Photos by Reynan Baylin/CIO)