Nanawagan karon si Mayor Rolando ‘Klarex’ Uy sa publiko nga magbantay ug dili magpalinlang sa nagpakatag og mga fake news nga binuhat sa mga troll accounts.

 

“Nanghinaut ako nga magmabinantayon ug magmatngon kitang tanan batok sa fake news. Dili kita motuo gilayon sa mga posts sa social media nga walay igong rason ug kapasikaran. Kinahanglan gayud nga atong sutaon una kung naggikan ba kini sa usa ka lehitimo ug kasaligan nga source o’ tinubdan,” pamahayag ni Mayor Klarex.

 

Gidugang pa sa mayor: “Dayag ug klaro man kaayo ang katuyoan sa mga troll accounts, ug kana mao lang ang paghimo ug pagsabwag sa mga sayop ug tumo-tumo nga impormasyon aron lang maguba ang imahe ug reputasyon sa usa ka tawo, grupo o’ kaha organisasyon”.

 

Ang panawagan gihimo sa mayor human mikaylap sa social media nga nag-ingon matud pa ang Director General sa Philippine Drug Enforcement Agency (PDEA) nga usa ka dakong opisyal sa Cagayan de Oro, lakip ang iyang anak nga kapitan sa barangay, ang giingong nalambigit sa ilegal nga kalihukan sa droga.

 

Gani man, gipasalamatan ni Mayor Klarex ang mga kadagkoan sa PDEA Region 10 human gihimakak sa maong ahensya nga sayop ug walay kamatuoran ang maong pamahayag nga giluwatan matud pa gikan sa PDEA Director General. (CIO)