Ang nasakmit nga pasidungog sa dakbayan sa Cagayan de Oro isip awardee sa unang higayon sa 'Seal of Good Local Governance 2023’ kon SGLG ug pagkapili isip ‘Top 6 Most Competitive Highly Urbanized City’ karong tuiga usa lang ka pagmatuod sa maayong pagdumala sa kasamtangang administrasyon ni City Mayor Rolando ‘Klarex’ Uy.

 

Kini ang pamahayag ni Janboy Actub, tigpamaba ni Mayor Klarex Uy, agi’g reaksyon sa pagsaway sa mga kritiko sa administrasyon kinsa miingon nga matud pa ‘mismanaged’ ang city hall sa Cagayan de Oro ubos sa pamunoan ni Mayor Klarex.

 

Gitin-aw ni Actub nga dili maangkon sa syudad sa Cagayan de Oro ang maong dakong garbo ug dungog kung nagpasagad pa ang pamunoan ni Mayor Klarex diha sa paghatag sa tiunay ug sinsero nga batakang serbisyo ngadto sa katawhan.

 

Dugang pa ni Actub nga dili basta-basta maangkon ang SGLG, sanglit kinahanglan nga makapasar ang usa ka local government unit sa 10 ka ‘areas of governance’, susama gihapon sa ‘Most Competitive Highly Urbanized City’ nga adunay lima ka pillars.

 

Ang 10 ka ‘areas of governance’ mao ang 1) Financial Administration and Sustainability, 2) Disaster Preparedness, 3) Social Protection and Sensitivity, 4) Health Compliance and Responsiveness, 5) Sustainable Education, 6) Business-Friendliness and Competitiveness, 7) Safety, Peace, and Order, Environmental Management, 9) Tourism, Heritage Development, Culture and Arts, ug 10) Youth Development.

 

Sa unang higayon, ang prestihiyosong ‘Seal of Good Local Governance’, nga gitunol sa Department of Interior and Local Government sa miaging tuig, nahimong testamento sa sinseridad, dedikasyon ug pinasahi nga ‘brand of service’ kon panerbisyo sa mga Kagayanon ubos sa liderato ni Mayor Klarex Uy.

 

Ang SGLG ug ‘Most Competitive Highly Urbanized City’ award nagsilbing sumbanan sa usa ka sihag, makiangayon ug makitawhanon nga pang-gobyeryo sa syudad sa Cagayan de Oro, panapos ni Actub. (CIO/Infographic by Rod Constantino)