Dugang tulo ka mga barangay nga mao ang Barangay 22, 24, ug 29 ang gitutokan karon sa City Anti-Drug Abuse Council (CADAC) ubos sa administrasyon ni Mayor Rolando Klarex’ Uy alang sa posibilidad nga madeklarar nga drug-cleared’.

 

Mao kini ang gibutyag ni Dr. Rhyselle Bernadette Melliza-Descallar, head sa City Anti-Drug Abuse Division – Oro Wellness Center (CADAD – Oro Wellness) atol sa regular meeting sa CADAC nga gidumala ni City Councilor Romeo Calizo isip co-charman, bag-ohay lang.

 

Si Dr. Descallar mipasabot nga adunay pipila ka problema nga giatubang sa maong mga barangay kalabot sa mga dokumento ug uban pa nga mga isyu apan naningkamot ang CADAC nga matabangan ang maong mga barangay nga masulbad kini.

 

Ang barangay nga adunay “drug-cleared” status wala magpasabot nga wala nay druga sa barangay apan nagpasabot nga ang mga sakop sa Barangay Drug Abuse Council nakaila sa mga residenti nga nalambigit sa gidili nga druga ug sila gipaubos sa community-based drug rehabilitation program.

 

Ang Regional Oversight Committee on Barangay Drug-Cearing Program nga gipangulohan sa Philippine Drug Enforcement Agency (PDEA-10) gilangkuban sa mga representante sa Department of the Interior and Local Government, Philippine National Police, Department of Health ug local government units mao ang motan-aw ug modeklarar sa usa ka barangay nga `drug-cleared’ basi sa mga rekisitos ug guidelines sa maong komitiba. (ALR/CIO/Photos by Reynan Baylin/CIO)