GARBO ug kalipay sa kadagkoan ug mga personahe sa City College of Cagayan de Oro ang paghatag og Certificate of Program Registration (CTPR) sa Technical Education and Skills Development Authority (TESDA) alang sa ilang Mobile Training Program (MTP) ug Community Based Training (CBT).

 

Ang MTP ug CBT, ubos sa Technical Skills and Technology Institute (TSTI) sa City College of Cagayan de Oro, naghatag ug nagtutok sa technical-vocational skills training alang sa construction and tourism industries.

 

Ang turn-over sa CTPR certificate natigayon sa TESDA MisOr Provincial Office ning syudad kinsa gidawat ni Ms. Mary Vil C. Acenas, ang Vocational Administrator sa City College of CDO-TSTI, diin mipadayag sa iyang dako’ng pasalamat sa maong pag-ila.

 

Ang maong pag-ila nagpamatuod lamang nga ang curriculum, training modules ingon man assessment methods sa City College of CDO nagsunod ug nagsubay sa TESDA guidelines ug nakahatag og kaayohan ug kaugmaon sa out-of school youth nga mga Kagay-anons diha sa ilang pagpangita og oportunidad sa panginabuhian.

 

Samtang gibutyag usab ni TESDA MisOr Provincial Director Ms Marigold Cherie R. Garrido nga ang programa sa City College of CDO - TSTI mitubag sa panginahanglanon sa mga local employers ug nakatampo sa kinatibuk-ang ekonomiknahong kalambuan sa syudad ug sa probinsya pinaagi sa paghatag og skilled workforce.

 

Dugang ni Garrido nga ang kasayon ug ang pagpaduol sa mga programa sa TSTI sa kabarangayan naghatag og direkta ug sayon nga kahigayonan nga sila makakat-on ug molambo.

 

ANG CTPR nga gihatag sa TESDA sa City College of CDO-TSTI training programs naghatag usab og kasigurohan sa OSYs nga makabaton og Certificate of Completion nga giila sa local ug international level.

 

Gitanyag sa City College of CDO-TSTI ang tech-vocational course sama sa Housekeeping NCII, Shielded Metal Arc Welding (SMAW) NCII, ug ubang specialized community-based programs, pinaagi usab sap ag-abag sa wing van nga gi-donar sa First Community Cooperative (FICCO) sa maong tunghaan. (CIO/Photos by City College of CDO)