Sugod sa katapusang quarter karong tuiga, doble na ang madawat nga Cost of Living Allowance kon COLA alang sa mga teaching ug non-teaching personnel sa Department of Education-Cagayan de Oro Division, gikan P500 ngadto na sa P1000 kada bulan.

 

Kini human gianunsyo ni Mayor Klarex Uy ang paghatag og dugang P500 financial allowance isip gasa sa mayor alang sa tanang personahe sa DepEd nunot sa kasaulogan sa ‘World Teachers Day’ kagahapong adlawa sa Limketkai Center Atrium.

 

Sa iyang mensahe, si Mayor Klarex nagkanayon nga iyang nakita ang kakulangon sa city COLA nga anaa lang sa P500 kada bulan sulod sa pipila ka katuigan, ug kini gihatag lang alang sa mga teaching personnel ug walay labot ang non-teaching personnel.

 

“Busa, sugod sa last quarter karong tuiga, makadawat na ang tanan teaching ug non-teaching personnel og dugang P500 pesos isip additional allowance,” pamahayag ni Mayor Klarex nga gikahugyaw sa liboan ka mga magtutudlo nga misalmot sa kalihukan.

 

Gawas pa niini, gimando usab ni Mayor Klarex ang pag-release sa Citizenship Development Program allowance nga balor og P1,650 nga madawat sa mga teaching ug non-teaching DepEd personnel sugod karong Oktubre 2.

 

Mihatag usab si Mayor Klarex og usa ka brand new Toyota Wigo isip premyo sa pa-raffle sa ‘World Teachers Day’ nga gitambongan nila ni Congressman Rufus Rodriguez, Bise Mayor Bebot Rodriguez, DepEd 10 regional director Dr. Arturo B. Bayocot, City Schools Division Superintendent Dr. Roy Angelo Gazo ug uban pang kadagkoan sa DepEd-Cagayan de Oro Division, lakip pipila ka mgamiyembro sa konseho ning syudad. (CIO/photos by Roel Felicitas)