MOKABAT 80 ka mga kawani sa city hall ug uba’ng ahensya sa gobyerno ang migradwar sa Basic Incident Command System training course (BICS) nga gipasiugda sa Cagayan de Oro City Disaster Risk Reduction Management Department pinangulohan ni CDRRMD department manager Mr. Nick Jabagat uban sa suporta sa Office of the Civil Defense (OCD-10) bag-ohay lang.

 

Mayoriya sa mga gibansay ang mga empleyado sa CDRRMD, samtang anaa usab mga represante gikan sa City Health Office, City Information Office, City Mayor’s Office, City Tourism and Cultural Affairs Office, JR Borja General Hospital, ug ubang ahensya sama sa Bureau of Fire Protection - Cagayan de Oro Fire District, ug Department of the Interior and Local Government – CDO.

 

Mapasalamaton si Mr. Jabagat human nagsilbing BICS lead instructor si Ret. Col. Mario-Verner Monsanto kauban ang ICS national cadre nga si Dr. Joseph Bacareza, uban sa mga personahe sa CDRRMD.

 

Lakip gipasalamatan niini si Mayor Rolando Klarex Uy sa hugot nga suporta sa pagpahigayon sa duha ka hugna nga training diin ang unang batch niadtong September 23-26 ug second batch niadtong September 27-30, 2024.

 

Laraw sa maong training nga masagop sa mga partisipante ang incident command system isip usa ka ‘response management concept’ nga magsiguro sa kaluwasan ug seguridad sa katawhan ingon man sa mga responders panahon sa unsa mang katalagman ug mga dinagkong kalihokan. (AGP/Photo by CDRRMD)