MOKABAT 2,259 ka mga Philhealth cards ug member data record (MDR) ang gitunol sa kagamhanang lokal sa Cagayan de Oro ubos sa administrasyon ni Mayor Rolando Klarex Uy, atol sa gipahigayong SurUY-SurUy sa Baryo: Klarex nga Serbisyo sa Panlawas, Oktubre 4, 2024 diha sa Barangay Patag, ning syudad.

 

Mapasalamaton ang syudad sa kanunay nga pag-uban sa Philhealth Region 10 isip partner sa City Health Insurance Office alang sa pagpahigayon og Philhealth Konsultasyong Sulit at Tama (KonSulTa) program matag Suruy-SurUy sa baryo adlaw’ng Martes ug Huwebes.

 

Gawas sa CHIO, anaa usab ang mga buhatan sa City Health Office, City Disaster Risk Reduction and Management Department, JR Borja General Hospital, City Social Welfare and Development Office, City Legal Office uban sa hugot nga suporta sa barangay.

 

Lakip sa serbisyong gitanyag ang laboratory, dental ug eyecare services, samtang nag-apod-apod usab og birthday cakes sa mga senior citizens sa Brgy Patag nga nagsaulog sa ilang birthday karong bulana.

 

Miduyog usab sa SurUy-SurUy si Barangay Carmen Kapitan Kikang Uy bitbit ang KapKik caravan nga nagpasiugda og dance contest, nag-apod-apod usab og cupcakes, popcorn ug ice cream sa mga misalmot sa programa. (AGP/Photo by Kim Zaldivar/CIO)