Makapuyo na sa ilang balay ang 25 ka mga benepisyaryo sa housing program sa syudad human gitunol kanila ni Mayor Rolando `Klarex’ Uy ang ilang entry pass atol sa flag raising ceremony sa city hall, Lunes Oktubre 7, 2024.

 

Si Cesar Pagapulaan Jr., acting department manager sa City Housing and Urban Development Department (CHUDD) namahayag nga sa 722 Pahiron nga relocation site sa Barangay Lumbia manimuyo ang mga benepisyaryo.

 

Kini nga kahigayonan ang gikalipay sa mga benepisyaryo diin dako ang ilang pasalamat kang Mayor Klarex kay nakabaton na gayud sila og kaugalingon nga balay.

 

Ang entry pass maoy panugot sa kagamhanang lokal ngadto sa usa ka benepisyaryo nga mopuyo na sa balay nga gihatag sa syudad.

 

Matud ni Pagapulaan nga ang pagtunol sa entry pass nunot usab sa kasaulogan sa National Shelter Month karon nga bulan diin adunay mga kalihokan nga gihan-ay ang CHUDD.

 

Ang pagpalig-on sa housing program ilabina ang pag-atiman sa mga informal settler families (ISFs) maoy usa sa mga priority ni Mayor Klarex ilawom sa RISE AGENDA aron mahatagan og desenteng pinuy-anan ang mga kabus. (ALR/CIO/Photos by Reynan Baylin/CIO)