TUNGOD sa taas nga kompyansa sa mga dagko’ng negosyante sa Cagayan de Oro, usa ka kasabutan ang gilagdaan ni Mayor Rolando “Klarex” Uy kauban ang National Development Corp. (NDC) ug ang Investment and Capital Corp. of the Philippines (ICC) adlaw’ng Sabado, Oktubre 18 ning tuig.

 

Ang maong kalamboan nagpamatuod lamang sa paspas nga pagsaka sa ekonomiya sa syudad ubos sa administrasyon ni Mayor Klarex Uy diin naila usab ang Cagayan de Oro isip usa sa mga nag-unang syudad ug ikaupat sa nasud nga “growth-area” sama sa Manila, Cebu ug Davao.

 

Lakip sa milagda sa kasabotan si NDC General Manager Antonilo Mauricio ug ICCP board chairman Guillermo Luchangco ug gisaksihan ni Councilor George Goking kinsa maoy chairman sa Committee on Trade and Commerce, Ways and Means sa konsheo ning syudad ug ang mga opisyales sa Cagayan de Oro Chamber of Commerce and Industry Foundation, Inc (Oro Chamber).

 

Ang NDC mao ang investment arm sa nasudnong kagamhanan samtang ang Pueblo de Oro Development Corp. mao ang major developer ug real estate arm sa ICCP group.

 

Gibutyag ni Luchangco nga lakip sa ilang plano ang pagtukod og luxury condominiums ug 31 ektaryas nga mixed-use development center susama sa Silicon Valley nga tukoron sa may uptown.

 

Matud ni Konsehal Goking ang paglagda sa maong kasabutan bunga sa gipahigayong investment forum didto sa kaulohan nga gipasiugdahan sa Oro Chamber ug Oro Trade Investments Promotions Center (Oro-TIPC) sa City Hall. CIO photos by Kim Zaldivar)