Giklaro sa City Accounting Department nga updated ang remittance sa loan payments sa Government Service Insurance System (GSIS) sa mga kawani ug opisyal sa kagamhanang lokal sa Cagayan de Oro matag bulan.

 

Kini human nakadawat ang mga empleyado ug opisyal sa city hall og notice pinaagi sa text message gikan sa GSIS nga nagpahinumdum sa ilang mga balayronon sa GSIS sulod sa bulan Oktubre ning tuig.

 

Gitin-aw ni Harry Steven Dadivas, Information Officer sa City Accounting Department, nga dili angay mabalaka ang nakadawat sa maong notice tungod kay naka-remit na ang city hall alang sa bulan sa Septiyembre 2024, sa wala pa miabot ang due date niadtong Oktubre 10, 2024.

 

Samtang ang due date alang sa bulan sa Oktubre 2024 karon pang umaabot Nobyembre 10, 2024, ug busa walay angay kabalak-an, dugang pasabot ni Dadivas (CIO)