BUKAS na sa publiko ilabina sa pamilya sa mga nagbangotan ang bag-ong natibawas nga City Memorial Park Chapel sa kanhi Bolonsiri Cemetery diin mismo si Mayor Rolando “Klarex” Uy ang nangulo sa pagbukas niini adlaw’ng Martes, Oktubre 29 ning tuig.

 

Sa mensahe ni Mayor Klarex iyang gipasabot nga dili lamang ang mga patay ang gihatagan og disenteng pahulayanan apan lakip usab ang kasayon sa pamilya ug mga paryente nga moduaw ug gustong magpamisa alang kanila.

 

Ang bag-ong chapel kabahin lamang sa kinatibuk-ang redevelopment project nga karon gipatuman sa City Memorial Park.

 

Kahinumdoman nga lakip sa natibawas ug kasamtangang napahimuslan na sa katawhan ning syudad ang crematorium, viewing chapels, mortuary, administrative building ingon man public toilets ingon man mga nitso.

 

Matud ni Mayor Klarex ang mga kahimanan sulod sa City Memorial Park libre’ng mapahimuslan sa katawhan ilabina gayud ang labaw nga nanginahanglan.

 

Samtang nagpadayon pa gihapon ang redevelopment ug pagtibawas sa uban pang pasilidad sulod sa City Memorial Park ingon man pagsemento niini. (ACM/CIO Photos by KIM ZALDIVAR)