GARBO ug kalipay sa Cagayan de Oro ubos sa administrasyon ni Mayor Rolando “Klarex” Uy ang lain na usab nga pasidungog nga nasungkit sa City Disaster Risk Reduction and Management Department (CDRRMD) bag-ohay lang.

 

Gidawat mismo ni CDRRMD Head Nick Jabagat ang award isip usa sa national awardee sa “Beyond Compliant City” atol sa gipahigayong 24th Gawad KALASAG National and Regional Awarding Ceremony.

 

Lakip sa pasidungong nga nakuha sa CDRRMD ang Advance Local Government Emergency Management and Response Team (GEMS Category) isip regional awardee ning tuiga.

 

Matud ni Jabagat ang awarding ceremony gipahigayon mismo dinhi sa syudad.

 

Ang maong kalihukan gipasiugdahan sa Northern Mindanao Regional Disaster Risk Reduction and Management Council adlaw'ng Biyernes, Nobyembre 29, 2024.

 

Ang pasidungog nagpamatuod pag-usab sa kahanas sa mga personahe ug maayong pagdumala sa CDRRMD ilabina sa pagpangandam ug pagtubag sa bisan unsang matang sa emerhensiya ug kalamidad dinhi ning syudad. (ACM/CDRRMD Photos)