GIAGHAT sa City Finance Department ubos ni City Treasurer Jasmin Maagad ang mga negosyante sa dakbayan sa Cagayan de Oro nga magpa-renew sa ilang business permit pinaagi sa online system.

 

Ang business permit online system ma-access sa link: citytreasurer.cagayandeoro.gov.ph

 

Kini human gipahibalo sa City Finance Department ang pagsugod sa tinuig nga business permit registration and renewal karong umaabot Enero 2 hangtud Enero 20, 2025 diha sa may City Tourism Hall.

 

Ang business permit online system gitanyag sa City Finance Department alang sa kasayon ug kaharuhay sa mga negosyante sa dakbayan nga buot maglukat o’ kaha magpa-renew sa ilang business permit.

 

Matud ni Maagad nga nag-unang tuyo sa maong online system nga dili na mahasol ang mga magbubuhis pagdalikyat sa city hall, diin kasagaran magpunsisok ang bagang duot sa katawhan panahon sa business permit renewal.

 

Gibutyag ni Assistant City Treasurer for Operations Engr. Leonil Mistula nga sobra 30,000 ka mga permittees sa dakbayan sa Cagayan de Oro ang gilaumang magpa-renew sa ilang business permit karong tuiga. (CIO/file photos)