Padayon ang masubsob nga kampanya sa Roads and Traffic Administration kon RTA sa pagpatunhay sa kadalanan sa syudad human mokabat 323 ka indibidwal ang nasikop tungod sa nagkadaiyang kalapasan sa balaod trapiko.

 

Kini ang gitaho ni RTA Overseer Atty. Jose Edgardo ‘Egay’ Uy subay sa resulta sa operasyon sa Special Action Teams nga gitahasan pagpahigayon og ‘random apprehension’ sulod sa Nobyembre 29 hangtud Disyembre 5, 2024.

 

Sumala ni Atty. Uy nga ang Special Action Teams naka-isyu og 61 ka citations ug 262 ka unattended tickets tungod sa parking violations, samtang gitangtang usab sa grupo ang walo ka unauthorized no-parking signs ug uban pang obstructions palibot sa syudad sama Carmen Market, barangay Nazareth, ug dalan Osmen̈a, Ramon Chaves, Pabayo ug Capistrano.

 

Samtang, gipahimangnoan ni Uy nga mapasakaan og tukmang kaso kadtong mibalewala pag-settle sa ilang multa kon administrative fines, diin moresulta na hinoon sa pagkahasol panahon nga magpa-renew sa lisensya o’ magparehistro sa sakyanan tungod kay kinahanglan pa sila maglukat og clearance sa RTA. (CIO/RTA file photos)