GARBO ug malipayong gisaksihan sa kinatibuk-ang burukrasya sa Cagayan de Oro ang ‘investiture’ o pag-ila kang Dr Jestoni P. Babia isip labing unang college president sa City College of Cagayan de Oro (CCCDO) karong adlawa, Disyembre 12, 2024.

 

Lakip sa misaksi ang mga kadagkoan, personahe ug estudyante sa CCCdO, CHED 10, TESDA ug pamilya ni Dr Babia.

 

Ang investiture program simbolo sa pagdawat ni Dr Babia sa responsibilidad, ingon man gahum sa pagdumala, pagpadagan ug pagpalambo sa labing unang city college sa dakbayan sa tinguha nga mahatagan og libre ug de-kalidad nga edukasyon ang mga kabatan-onan.

 

Si Dr Babia, kansang kahanas ug katakos sa pagdumala nasulayan na sa ubang dagko ug inila nga mga institution sa nasud, nagpadayag usab sa iyang mainitong pagdawat sa gisangon kaniya ni Mayor Rolando “Klarex” Uy ug mipasalig sa iyang makugiho’ng pagpalambo niini.

 

Gidawat ni Dr Babia ang Presidential Medallion ug Mace nga nagsimbolo sa CCCdO atol sa maong kasaulogan.

 

Lakip sa misaksi si City Councilor Suzette Magtajas-Daba, chairman sa Committee on Education sa 20th City Council, nga mirepresentar usab kang Mayor Klarex Uy, City Administrator Roy Raagas, ug Executive Director sa Local School Board Dr Alicia Anghay ug uban pa. (ACM/CIO Photos KIM ZALDIVAR)