Nunot sa ika-13 ka tuig nga paghandum sa paghapak sa bagyong Sendong ning syudad diin liboan ka mga tawo ang nakabsan sa kinabuhi ug ang uban nagpabilin nga missing, mokabat 27 ka titulo sa yuta ang gitunol sa syudad pinangulohan ni Mayor Rolando `Klarex’ Uy ngadto sa mga Sendong survivors nga nanimuyo sa SMC-GK Village sa Barangay Balubal, Lunes, Disyembre 16, 2024.

 

Sa iyang mensahe, gipasabot ni Mayor Klarex nga ang gobyerno kanunay nagtan-aw ug naghatag og kasigurohan sa katawhan. Gani, mas nakasiguro ang mga Sendong survivors nga sila na ang tinuod nga tag-iya sa yuta ug balay nga ilang gipuy-an tungod sa titulo sa yuta nga ilang nahuptan.

 

Samtang, gipasabot ni Cesar Pagapula-an Jr., acting dep’t manager sa City Housing and Urban Development Department (CHUDD) nga sa kasamtangan adunay kapin usa ka gatos nga mga papel ug dokumento alang sa pagpatitulo sa yuta ang kamulo pa nga gi-process sa ilang buhatan.

 

Si Majority Floor Leader City Councilor Edgar Cabanlas, namahayag nga sa 500 ka mga Sendong survivors nga nanimuyo sa maong relocation site, kapin sa 300 na usab ang nahatagan og titulo sa yuta. (ALR/CIO/Photos by Reynan Baylin & Roel Felicitas/CIO)