NAHIMONG KAMPYON ug modawat sa cash prize balor P60,000 ang mga tinun-an gikan sa East City Central School sa gipahigayon nga Marching Band Competition 2024 adlawa’ng Miyerkules, Disyembre 18, atol sa culminating activity sa ‘Pasko de Oro: Paskong Kauban ang Pamilya’.

 

Lakip naangkon sa East City Central School ang titulo isip Best Band Major.

 

Nasayran moabot sa pito ka mga pampublikong tunghaan sa elementarya ang misalmot sa Marching Band Competition nga gilangkoban sa Kauswagan Central School, Puerto Elementary School School, Indahag Elementary School, East City Central School, North City Central School, Bulua Central School ug Upper Carmen Elementary School.

 

Nasakmit usab sa Puerto Elementary School ang 2nd prize ug modawat sa 40,000.

 

Samtang P30,000 cash usab ang dawaton sa 3rd runner up gikan sa Bulua Central School.

 

Nakuha usab sa Upper Carmen Elementary School ang titulo isip Best Band Majorette.

 

Sa laing bahin nasakmit usab ang kadaugan sa Barangay Lapasan isip champion sa PaskoRela 2024, 2nd runner up ang Barangay 1 ug 3rd runner up ang Barangay Camaman-an.

 

Mapasalamaton ang kagamhanang lokal sa Cagayan de Oro sa pagpangulo ni City Mayor Rolando ‘Klarex’ Uy ingon man ang City Tourism and Cultural Affairs Office sa tanang ahensya ug pribadong sektor sa kalamposan sa tanang kalihokan sa ‘Pasko de Oro 2024: Paskong Kauban ang Pamilya’. (AGP/Photo by Kim Zaldivar/CIO)