Agi'g katumanan sa saad ni City Mayor Rolando 'Klarex' Uy, gisugdan na sa miaging adlaw ang pag-release sa mga bonus alang sa mga opisyal ug kawani sa city hall.

 

Sa iyang pagtambong sa pagpakayab sa nasudnong bandila niadtong unang Lunes ning bulan, gipahibalo ni Mayor Klarex nga madawat sa mga kawani ning syudad ang Personnel Motivation Incentive (PMI), apil ang Productivity Enhancement Incentive (PEI) ug Extra Service Bonus sa dili pa ang Christmas party sa city hall karong Disyembre 20.

 

Ang PMI nagbalor og usa ka bulan nga sweldo sa mga casual ug regular, samtang ang PEI nagbalor og P5,000 ug balor P15,000 usab ang Extra Service Bonus sa mga job order.

 

Gawas pa niini, nadawat na usab sa mga kawani sa city hall ang ilang sweldo nga balor usa ka bulan, lakip tag-usa ka sako sa 50 kilos nga bugas.

 

Gipasabot sa City Finance Department ubos ni City Treasurer Jasmin Maagad nga ilang gipaspasan ang pag-proseso sa mga payroll sa bonus aron ma-download gilayon kini sa ATM account sa mga kawani sa syudad.