Bukas karong adlaw’ng Sabado ug Domingo, Enero 4 ug Enero 5 gikan alas-8:00 sa buntag hangtud ala-5:00 sa hapon ang Business One-Stop Shop (BOSS) sa City Tourism Hall aron pagproseso sa business permit, sigun pa sa pahibalo ni Mr. Jason Adaza, hepe sa Business Permits and Licensing Division (BPLD) sa City Mayor’s Office.

 

Si Adaza nagkanayon nga tuyo sa ‘weekend business permit registration and renewal’ nga mahatagan og igong kahigayonan ang mga negosyante sa dakbayan nga maka-renew sa ilang business permit.

 

Gawas pa niini, gilugwayan usab sa BPLD ang ilang ‘operating hours’ hangtud ala-7:00 sa gabii matag adlaw’ng Lunes hangtud Biyernes aron ma-akomodar ang buot maglukat sa business permit o’ kaha magparehistro sa bag-ong negosyo.

 

Gisugdan sa BPLD kauban ang ubang buhatan sa city hall ug nasudnong ahensya sa gobyerno ang tinuig nga business permit registration and renewal niadtong Enero 2, 2025, ug matapos ang renewal period karong umaabot Enero 20, 2025.

 

Aron dili na mahasol pagdalikyat sa city hall, gidaseg ni Adaza kadtong gusto magpa-renew sa ilang business permit sa paggamit sa online billing and payment system sa City Finance Department pinaagi niini nga link: citytreasurer.cagayandeoro.gov.ph (CIO)