LUYO sa kasadya sa kapaskohan ug bag-ong tuig, padayong naningkamot ang kagamhanang lokal ubos sa administrasyon ni Mayor Rolando “Klarex” Uy sa pagtubag sa taas nga ‘volume’ sa basura gikan sa kamerkadohan ug kabalayan ning syudad.

 

Kini human misaka ang ihap sa gidaghanon sa basura nga natala sa City Local Environment and Natural Resources Office (Clenro) human sa kasaulogan sa pasko ug bag-ong tuig gikan sa 2,432,540 kilos sa tuig 2023 nagdto sa 2,658,716 sa tuig 2025 (December 23 to January 1, 2025).

 

Gipasabot ni Engr Armen Cuenca, hepe sa Clenro, nga ang pagsaka sa gidaghanon sa basura tungod usab sa nabatasan na sa katawhan nga paghinlo ug paglabay sa mga dili na mapuslan nga mga gamit sa panimalay sa dili pa sugaton ang Bag-ong Tuig.

 

Apan bisan pa niini, mismo na ang kagamhanang lokal ang mitabang sa private garbage collector nga Tencil sa paghakot sa basura human nakita sa monitoring niini nga daghan pa gihapon ang wala nahipos sa private garbage collector.

 

Gipasalig sa LGU CDO nga duha ka adlaw (Enero 4-5) nilang abayan ug tabangan ang Tencil gamit ang mga kaugalingong ekipo sa syudad sa paghakot sa mga basura.

 

Apan nanghinaut ug naghangyo usab ang syudad sa kooperasyon sa katawhan ug pagsunod sa saktong oras sa paglabay sa ilang basura. (CIO/Photos by KIM ZALDIVAR)