GIHUPAY ni City Mayor Rolando ‘Klarex’ Uy ang kabalaka sa katawhan ning syudad sa giingong insidente sa kidnapping nga iresponsableng gipakatag karon sa social media tungod kay wala kini kamatuoran.

 

“Dili kana tinood ug walay kamatuoran. Bisan unsa na lang nga pamaagi nga madiskurahi ug pangdaot sa politika, unta dili apilon nga makapaulaw sa atong dakbayan o’ makahulga sa kahusay ug kalinaw, ug makapahadlok sa mga investors nga mobubo og puhunan dinhi sa dakbayan, magduha-duha na hinoon”, pamahayag ni Mayor Klarex atol sa ‘Klarex nga Serbisyo sa Baryo’ sa barangay Pagatpat niadtong Sabado, Pebrero 1.

 

Gani man, gipasabot ni Mayor Klarex nga walay nadawat ang iyang buhatan nga taho o’ kompirmasyon gikan sa Cagayan de Oro City Police Office (COCPO) ubos ni City Police Director Col. Salvador Radam kalabot matud pa sa isyu sa kidnapping dinhi sa Cagayan de Oro.

 

“Dili gayud kana mahitabo kay 24/7 naningkamot sa pagbantay sa atong seguridad ang COCPO, kauban ang Task Force Oro, nga nagtuman sa ilang tahas ug katungdanan,” pasalig sa mayor human kusganong gipatuman kanunay sa mga kapolisan, kauban ang Task Force Oro, ang hugot nga seguridad alang sa pagmintinar sa kahapsay ug kalinaw sa dakbayan. (CIO)