GISUGDAN kagahapo’ng adlawa, Pebrero 3, 2025, ang usa ka bulan nga renewal sa business permit sa mga stall holders sa merkado sa Cogon, Carmen, Puerto, ug East-Westbound Terminal and Public Market (EWTPM).
Gibutyag ni Mary Sean Molig, acting department manager sa City Economic Enterprises and Business Development Administration (CEEBDA) nga sama sa naandan nga mga proseso sa renewal, dalhon sa mga market stall holders ang 2024 business permit diha sa ilang pag renew.
Nasayran nga sa Cogon Market adunay kapin dos mil ka mga stall holders, usa ka libo sa merkado sa Carmen, 183 sa Puerto market ug dul-an 400 usab sa EWTPM.
Samtang gipadayag usab ni Molig nga aduna silay gihimo nga win-win solution alang sa mga delinquent vendors aron sila makabayad ug mahatagan sa higayon nga makapadayon sa ilang panginabuhi.
Sa tinguha nga dili malimot ang mga stall holders sa ilang obligasyon adunay regular nga public address, ug rekoreda ingon man posting sa fb page sa CEEBDA ang gihimo. (ALR/CIO)