Moabot na sa 217,533 ka mga kliyente ang nakabenepisyo sa mga batakang serbisyo nga libreng gitanyag sa kagamhanan ning syudad sukad gilusad ni Mayor Rolando ‘Klarex’ Uy ang ‘Klarex nga Serbisyo sa Baryo’ duha ka tuig ug tunga na ang milabay.

 

Ang one-stop shop community outreach program o’ mas naila nga KSB unang gilusad ni Mayor Klarex sa barangay Tignapoloan niadtong Agosto 25, 2022, kapin usa ka bulan lang human sa iyang paglingkod isip mayor sa dakbayan sa Cagayan de Oro.

 

Sulod sa maong panahon, 82 ka hugna sa KSB ang napahigayon sa nagkadaiyang barangay sa Cagayan de Oro, diin napahimuslan sa katawhan ang mga serbisyo sa panglawas sama sa paghiling sa nagkadaiyang balatian, ibot sa ngipon, check-up sa mata, libreng tambal ug medisina, pagrehistro sa pagkatawo, pag-apod sa mga binhi sa kahoy ug prutas, paglukat sa business ug building permit, pagbakuna sa mga hayop, ug daghan pang uban.

 

Lakip sa nakahatag og dakong oportunidad sa mga residente sa barangay mao ang ‘Kasalan ng Bayan’, diin mismo si Mayor Klarex ang magpahigayon sa seremonyas sa kasal sa mga magtiayon nga dugay nang nag-ipon-ipon.

 

Nag-unang tumong sa ‘Klarex nga Serbisyo sa Baryo’ nga mahatud gayud sa tugkaran sa kabarangayan ang mga batakang serbisyo sa syudad aron dili na kinahanglan pa nga modalikyat sa city hall ang mga residente nga nangihanglan sa serbisyo.

 

Kini subay na usab sa gitamod ni Mayor Klarex nga prinsipyo ug talagsaong baruganan sa way pili nga pagpangalagad sa tanan sa tuyo nga mabati ug makita sa katawhan nga …”ang gobyerno duol sa katawhan, ang katawhan duol sa gobyerno”. (CIO)