SUPORTADO sa 20th City Council ang panlantaw ug tinguha ni Mayor Rolando “Klarex” Uy sa pagmugna og City College of Cagayan de Oro pinaagi sa pagkompirmar kang Dr Jestoni P. Babia isip University College (UC) President III ug labing unang presidente sa libre’ng kolehiyo sa syudad.

 

Kini pinasubay sa Resolution No 2025-974 ni City Councilor Suzette Magtajas-Daba niadtong Lunes, Pebrero 17 atol sa ika-112th Regular Session.

 

Ubos sa maong resolution, nalatid ang paghatag og suholan o salary grade subay usab sa Commission on Higher Education (CHED) ug Department of Budget and Management (DBM).

 

Tungod niini, dako usab ang pasalamat sa City College of Cagayan de Oro ilabina kang Councilor Daba kinsa maoy chair sa Committee on Education sa iyang hugot uug kinasing-kasing nga suporta sa tumong ug panlantaw ni Mayor Klarex nga mahatagan og kahigayonan ang tanan nga buot makaangkon og libre’ng college degree ilabina kadtong naglisod nga makatungha og kolehiyo.

 

Dako usab ang pasalamat sa City College of Cagayan de Oro sa majority members sa city council sa ilang suporta.

 

Tungod niini, gipasalig sa maong tunghaan nga dili makawang ang ilang suporta sanglit usa kini ka dakong lakang nga makuha sa city college ang Institutional Recognition (IR) nga maoy kinahanglan nga mas mapalapdan pa ang serbisyo ug kahigayonan alang sa tanang Kagay-anon. (ACM/CIO)