Misaka og 10.36 porsiyento ang gidaghanon sa mga establisemento ug patigayon dinhi sa dakbayan sa Cagayan de Oro nga naglukat og business permit, kung itandi ang talaan sulod sa Enero 2 hangtud Pebrero 15 ning tuig komparar sa miaging tuig, sumala pa ni Mr. Jason Adaza, ang hepe sa Business Permits and Licensing Division (BPLD) sa City Mayor’s Office.

 

Kini human mitala ang BLPD og 20,775 ka mga establisemento nga bag-ong nagparehistro o kaha nagpa-renew sa ilang business permit sulod sa maong panahon karong tuiga, mas taas kung ikomparar sa 18,824 nga natala sa miaging tuig.

 

Sa maong datos, si Adaza nagkanayon nga mokabat sa 1,098 ka mga negosyo ang bag-ong rehistro sa tuig 2025, samtang 1,039 usab ang bag-ong rehistro sa tuig 2024.

 

Subling gipahibalo sa BPLD nga matapos na ang business permit registration and renewal diha sa may City Tourism Hall karong Pebrero 28 ning tuig human gilugwayan ni Mayor Klarex Uy ang deadline sa renewal agi’g tubag sa hangyo sa hugpong sa mga negosyante ning syudad. (CIO)